500 Joor Schoofegg ladet zum Fyyren yy.
E Hampfle Journis sinn au derby.
Dr Armin vo Faesige alle voraa,
dr Baschi findet, Du bisch my Maa.
E Geegedrummeli muess dringendscht sy,
Armin machsch mit? Bisch au derby?
S wird plant, gmacht und do,
1976 sott das Kind uff d Bühni ko.
A propos Kind: En Idee persee,
au däne wänn mr e Charivari gee.
S Kinder-Charivari vo Aafang aa derby,
bis hüt luege au Erwaggseni gärn dry.
Im Glaibasel soll me s Charivari bschaue!
Im alte Volkshuus wird uff dr Putz ghaue.
Das Volkshuus bruucht dringendscht e Renovazion, auwee,
drum isch s Charivari 1978 im Gundeli Casino z gsee.
Dr Baschi rieft zum Uffstand mit wehende Faane,
är tobt und bolderet, e Geegeblaggedde muess aane.
So öbbis losst sich d Schoofegg-Mafia nit biete,
was wänn iir im Grossbasel, iir Niete?
Nach hi und här und vyl Gezeeder –
dr Baschi duet als wie bleeder.
1979 schloot men e verseenligi Brugg
und goot ins neue Volkshuus zrugg.
In all de Joor git s vyli Wirt, vyl, wo spinne
und e mänggi Spinne im Uusschangg inne.
E Techtelmechtel do und eins dört,
s einti goot, s ander stört.
E Grundlaag für Aneggdote und Gschichte,
mir könnte do no vo ganz vyl brichte.
Ob Politiger, Mäzen oder grosse Star,
alli zämme hogge si an dr Charivari Bar.
D Mamme Wettstai duet frohlogge,
und ganz säälig uf em Stieli hogge.
Dr Babbe mit em Buschi und drei Kinder
findsch nid minder entzüggt derhinder.
In 50 Joor het me vyl Tolls uff dr Charivari Bühni gsee,
luegsch melancholisch zrugg und dänggsch auwee.
Mergsch, me könnt no 1000 Värs schryybe.
Kasch berueigt sy, das löön mr blyybe.
Lueg dä Zeedel aa und die ganzi Syte,
due si uffmergsam, geduldig beschryte.
E paar Schetz us dr Vergangeheit wirsch do finde,
E baar ganz vorne und no mee wyterhinde.
Mr lade di yy, s isch famoos
zem Charivari uf dr Strooss.
